為回饋大家對電影節發燒友的支持，我們將於 7 月 28 日（星期五）晚上七時四十五分於奧海城2期the sky舉行「電影節發燒友 會員夏日熱身場」。當晚特別選映《求生走佬 Family》作為「Cine Fan 夏日國際電影節 2017」免費熱身場，屆時將提供免費熱狗或爆谷套餐（配汽水或樽裝水），歡迎各位會員參加。
熱身場將於 7 月 21 日(五) 下午2 時開始登記。每名會員最多可獲派2 張門票。名額有限，請勿浪費，先到先得，額滿即止。
如有任何爭議，香港國際電影節協會保留最終決定權。
****************************************************************************************************
影片簡介：
假如一覺醒來，全世界突然大停電，手機唔著上唔到網，電器失靈缺水斷糧地鐵火車全面癱瘓，平日享慣科技文明的我們驟然回歸原始，如何活下去？
住在東京的鈴木四口之家，表面一家人實則各自為政關係凍過水，阿爸終日望住部電視，阿仔只顧住聽歌，阿女忙住玩手機，冇人得閒睬阿媽。點知有日一早醒來發現屋企停電，手機、電腦、電器全部失靈，開唔到車地鐵又停駛，初時只擔心返工返學點算好，最愁都係無得上網玩手機⋯⋯後來才驚覺大件事，全個東京大停電，交通網絡全面癱瘓，缺水又斷糧，全城頓成廢墟！面對如此重大危機，一家之主終於要揸返次主意，毅然決定帶住老婆仔女出走東京展開求生大逃亡！
預告：https://youtu.be/NUZq1zsxJfw
